Misteri rreth dëmti mi të Nejmarit ka ardhur, më në fund, në pikën e zgjidhjes: dhe fitues, në njëfarë mënyre, ka dalë “O’Ney”. Përmes një komunikate, PSG-ja ka njoftuar ditën e djeshme se “në përfundim të protokollit ku janë planifikuar tri ditë kurimi, pas një ballafaqimi me stafin mjekësor të klubit parisian dhe atë të kombëtares braziliane, gjithashtu në akord me lojtarin”, sulmuesi “do t’i nënshtrohet një ndërhyrjeje kirurgjikale në fundjavë, në Brazil, nga doctor Rodrigo Lazmar (i “Selecao”-s) që do ketë si asistent për rastin mjekun Saian (të PSG-së)”.
DY MUAJ – Nejmar, që mbeti i dëmtuar në këmbën e djathtë gjatë sfidës së ditës së diel në mbrëmje kundër Marsejës, do detyrohet kështu të qëndrojë i ndalur për një periudhë të gjatë, me shumë mundësi dymujore. Përgjigjen e mjekëve e kishte paraprirë babai i 26- vjeçarit gjatë një interviste për ESPN në Brazil, ku ishte shprehur se “duhen të paktën 6 deri në 8 javë për rikuperimin e tij. Vendimin e fundit do e marrë PSG-ja, jo lojtari.
Do shohim si do veprohet së bashku me mjekun e kombëtares braziliane. PSG-ja, megjithatë, e di se nuk do e ketë në gatishmëri për së paku 6 javë”, duke konfirmuar paraprakisht, në një- farë mënyre, mungesën e futbollistit ndaj Realit të Madridit, në ndeshjen e kthimit për 1/8-at e Ligës së Kampionëve.
BOTËRORI – Zgjedhja e rrugës së operacionit, me sa është kuptuar nga mediat franceze, është kërkuar me ngulm edhe nga përfaqësuesja braziliane, me ankthin për të parë “ish”-in e Barcelonës në formë optimale për Botërorin e ardhshëm rus.
E mbështetur, megjithatë, nga PSG-ja, që dëshiron ta ketë të gatshëm për finalen e sezonit. Nejmar ka shënuar 29 gola në 30 ndeshje të luajtura me PSG-në këtë sezon, që kur u bashkua me francezët verën e kaluar për shifrën rekord të 222 milionë eurove.
