Mesditën e sotme qyteti i Shkodrës u alarmuar nga disa të shtëna me armë zjarri ndërsa Policia lajmëroi se nuk pati persona të plagosur.
Ndërkohë autorët u larguan nga vendi I ngjarjes por janë arrestuar mbrëmjen e sotme dhe burime bëjnë me dije se bëhet fjalë për Gledis Ustabeqiri 26-vjeç, Hygert Muçaj, 32-vjeç, Taulant Ahmeti.
Mësohet se Ustabeqiri dhe Muçaj ishin në të njëjtën makinë ndërsa janë konfliktuar me Ahmetin. Ata kanë qëlluar në ajër me pistoletë për të trembur këtë të fundit dhe më pas janë larguar nga vendi i ngjarjes.
Ka qenë një telefonatë në sallën operative ajo që ka vendosur në lëvizje policinë e Shkodrës, e cila është nisur menjëherë drejt vendngjarjes.
Mësohet se arsyeja e konfliktit mes tyre ka qenë banale, pasi njëri prej tyre i ka thë tjetrit “Pse më shikon ashtu”.
Kjo është ngjarja e dytë në pak ditë në Shkodër, ku regjistrohen të shtëna me armë mes grupeve rivale, por që fatmirësisht sot nuk pati të plagosur në radhët e kalimtarëve.
Shkoder/ Informacion Paraprak
Më datë 12.02.2020, rreth orës 14:00, në vendin e quajtur Parruce, në rrethana ende të paqarta, dyshohet se një shtetas ka qëlluar në ajër me armë zjarri dhe është larguar me automjet .
Nga verifikimet e bëra nga policia nuk ka persona të dëmtuar.
Shërbimet e Policisë kanë shkuar menjëherë në vendngjarje së bashku me grupin hetimor dhe vijon puna për sqarimin e rrethanave të ngjarjes, me qëllim identifikimin dhe kapjen e autorit.
