Kreu i opozitës Lulzim Basha përmes një videoje në rrjetet sociale, ka ftuar të gjithë qytetarët që t’i bashkohen protestës së sotme përpara kryeministrisë.
Sipas Bashës kjo është rruga e duhur për të treguar vendosmëri për të larguar Edi Ramën dhe për t’i dhënë vendit mundësi për çdo shqiptar, duke zgjedhur me votë të lirë një qeveri që punon në interes të qytetarëve.
“Padrejtësinë, pamundësinë, varfërinë dhe papunësinë nuk do t’ua lemë trashëgim fëmijëve! Sonte në orën 20:00, në Tiranë të gjithë bashkë për familjen dhe fëmijët tuaj, për Shqipërinë e mundësive për të gjithë! #8korrik #ShqipëriaSiEuropa! Asnjë hap pas! #RamaIk”, është ftesa e liderit të opozitës në një videomesazh.
Ndërkohë që duket se dhe protesta e sotme do të jetë paqësore, pasi Basha fton të gjithë qytetarët që të jenë në protestë së bashku me fëmijët e tyre.
“Arrogancës dhe shpërfilljes, iu përgjigjëm me refuzim
Padrejtësisë, do t’i përgjigjemi me qendresë!
Pamundësinë, varfërinë, papunësinë nuk do t’ua lëmë trashëgim fëmijëve.
Ne treguam se jemi më të fortë se e keqja.
Ne duam një të ardhme me mundësi për të gjithë
Bashkë për të ardhmen!
Bashkë për Shqipërinë!”- janë mesazhet në videon e shpërndarë nga lideri i opozitës Lulzim Basha.
