Skandali i përgjimeve dhe reforma në drejtësi shkak për një debat të ashpër mes krerëve të mazhorancës
Takimi i përjavshëm mes kryeministrit Rama dhe kryetarit të Kuvendit, Ilir Meta, është shoqëruar sot me debate të ashpra mes tyre. Burime pranë takimit thanë se skandali i përgjimeve, por edhe çështja e pazgjidhur e votave për reformën në drejtësi, kanë qenë në qendër të këtij debati mes krerëve të shumicës. Duket se çështja e përgjimeve nuk është mbyllur ende, pasi kreu i LSI-së me ç’duket ka marrë në konsideratë akuzat se mund të jetë përgjuar bashkë me të tjerë titullarë të mazhorancës, ministra e deputetë.
Tjetër temë që ka ndezur debatin mes Ramës e Metës është edhe çështja e reformës në drejtësi. Iniciativa e 33 deputetëve kryesisht socialistë, ka qenë një hap me sa duket i njëanshëm, i cili detyroi Vasilin të firmoste. Më pas erdhi letra e djeshme e Gramoz Ruçit, i cili kërkoi nga kryetari i Kuvendit përfshirjen në kalendarin e punimeve të draftit të reformës në drejtësi. Ndërsa LSI ka propozuar që reforma të miratohet me konsensusin e opozitës. Burime pranë takimit thanë se tonet mes dy krerëvë të mazhorancës kanë qenë të larta duke paralajmëruar kështu një prag krize të fortë brenda koalicionit PS-LSI, ku nuk përjashtohet kriza qeveritare.
