Akuzohen për dhunë ndaj policisë dhe protestë të paligjshme. Strazimiri akuzohet edhe për armëmbajtje pa leje
Policia e Tiranës ka paditur në prokurori nëntë deputetët të opozitës. Deputetët e PD-së Flamur Noka, Genti Strazimiri, Genc Pollo, Albana Vokshi, Arben Ristani, Asllan Dogjani, Gert Bogdani, Edi Paloka, auzohen se zhvilluan protestë pa leje dhe ushtruan dhunë ndaj policisë. Deputeti Gent Strazimiri ka dhe një akuzë shtesë për armëmbajtje pa leje. Policia e Tiranës i referohet fotografisë në të cilën deputeti demokrat shfaqej me një pistoletë në brez gjatë përplasjeve të djeshme me policinë në protestën tek Parku i liqenit.
Përmes një njoftimi për mediat, policia sqaron: “Nga dhuna e ushtruar nga deputetët dhe protestuesit, u dëmtuan dhe po marrin mjekim në spitalin e Traumës, 3 punonjëse të Policisë Bashkiake. Në vijim të veprimeve të dhunshme të kryera nga deputetët e subjektit politik Partia Demokratike, referuar pamjeve filmike rezulton se deputeti Gent Strazimiri gjatë kohës që ishte në protestë krahas veprimeve të dhunshme ndaj policisë, i dallohej në brez një armë zjarri (pistoletë). Zoti Strazimiri ka qenë i pajisur me armë zjarri në 26.03.2009, kur ka qenë zv/ministër i Brendshëm.
Por në zbatim të Ligjit nr. 74/2014 “Për armët”, duke filluar nga 26.02.2016, lejet dhe aktet e tjera administrative që japin të drejtën mbi armët, humbasin fuqinë juridike. Deputeti Strazimiri, nuk ka kryer asnjë veprim për dorëzimin e armës, megjithëse është njoftuar edhe me një shkresë nga Komisariati nr. 3, Tiranë”, theksohet në njoftimine policisë Tiranë.
