Policia e Vlorës është duke vijuar aksionin për kapjen e anëtarëve të grupit Habilaj ndërsa ka nisur një hetim pasuror për sekuestrimin e pasurisë së tyre dhe bllokimin e llogarive bankare.
Kjo u bë e ditur nga Drejtori i Policisë së Vlorës, Gentian Sehaj gjatë një deklarate për mediat të bërë sot.
“Policia e Vlorës ka referuar në Prokurori, materialet në ngarkim të vëllezërve Habilaj, për veprën penale “Pastrimi i produkteve të veprës penale”, parashikuar nga neni 287 i Kodit Penal.
Në vijim të Mega – Operacionit “Banda e Babicës”, të zhvilluar nga Policia e Vlorës nën drejtimin e Prokurorisë për Krimet e Rënda Tiranë dhe mbështetjen e Repartit Delta Forcë, ku u sekuestrua 4 ton Cannabis Sativa, armë gjahu, municion luftarak, mjet lundrues dhe u arrestuan dy shtetas, ju informojmë se:
Operacioni për identifikimin dhe kapjen e pjestarëve të bandës së Babicës, gjetjen dhe sekuestrimin e lëndës narkotike që mund të jetë fshehur nga kjo bandë është në vijim.”, tha Sehaj.
