Drejtori i Policisë së Shtetit Drejtues Madhor Haki ÇAKO, së bashku me Drejtorin e Përgjithshëm për Sigurinë Publike Drejtues i Lartë Altin Qato dhe drejtues të tjerë të Policisë pritën në një takim Oficerët Ndërlidhës Policorë të atashuar në vendin tonë dhe drejtuesit e misioneve që asistojnë Policinë e Shtetit.
Takimi i sotëm që vjen si rezultat i një standarti të ri komunikimi të vendosur kohët e fundit nga Policia e Shtetit është përqëndruar mbi masat dhe rezultatet e Policisë së Shtetit në luftën kundër kultivimit të bimëve narkotike.
Çako ka theksuar se ky takim është i treti i këtij formati dhe e ka cilësuar si mjaft të rëndësishëm, pasi për Policinë e Shtetit, marrëdhëniet me partnerët dhe informimi në mënyrë periodike i tyre, është një vlerë e shtuar në rezultatet e punës së Policisë së Shtetit.
Ndërkohë ÇAKO ka falënderuar përfaqësuesit e Guradia Di Finanza dhe të Universitetit të Napolit, të Misioneve ICITAP, PAMECA dhe të OSBE-së, si dhe të gjithë Oficerët Ndërlidhës Policorë të atashuar në vendin tonë, për marrëdhëniet mjaft të mira të bashkëpunimit, për asistencën e tyre në punën e përditshme të Policisë së Shtetit, si dhe për kontributin e dhënë në luftën kundër kultivimit të lëndëve narkotike dhe krimit.
Më tej, Drejtori i Përgjithshëm për Sigurinë Publike, Altin QATO ka bërë prezent për të pranishmit rezultatet e deritanishme në këtë fushë dhe ka theksuar se këtë vit me kërkesë të Ministrit Tahiri monitorimi nga ajri është bërë në të gjithë vendin.
Prof. Dr. Carmine Gambardella, Dekan i Universitetit të Dytë të Napolit, njëkohësisht dhe Drejtor i Qendrës “BENECON”, theksoi se gjatë periudhës së monitorimit nuk është evidentuar asnjë problematikë dhe teknologjia e përdorur këtë vit ka qenë 100% e saktë.
