Kryeministri Rama është shprehur mbrëmjen e sotme se në kuadër të planit ekonomik për koronavirusin do tu mbahen gjysmat e pagave ministrave dhe zv.ministrave.
Në një komunikim live nga Kryeministria, Rama tha se do të donte që të gjithë ata që paguhen më shumë dhe politikanët të paguanin diçka nga vetja, por i kishin tërhequr vëmendjen pasi mund të interpretohej sikur qeveria nuk kishte para për të paguar pagat.
“Unë doja që qysh në planin fillestar të heqim diçka nga vetja. Ata që marrin shumë apo ata që paguhen më shumë duhet të paguanin dicka. Por më tërhoqën vëmendjen se mund të keqinterpretohej. Se do thonin që qeveria ska fonde për të paguar pagat. Kështu vendosëm që nga paga tyre të heqin dicka vetëm anëtarët e këshillit të ministrave. Ata do të marrin vetëm gjysmën e pagës.
Edhe deputetët deri në mbarim të luftës do të marrin vetëm gjysmën e rrogës. Nuk duam të krijojmë asnjë keqkuptim duke përgjysmuar pagën e Presidentit të Republikës të cilin haka e do që ti bëj një falenderim publik për faktin që sa kemi hyrë në këtë luftë po ndihmon si dhe sa mundet”, u shpreh Rama.
