Tani nuk bëhet më fjalë për shkelje të Kushtetutës, por për të kuptuar arsyet përse Sali Berishës i duhet të fitojë kohë në një proces formal të shkarkimit dhe emërimit të dy ministrave, duke keqpërdorur Bujar Nishanin. Ajo që ka bërë sot Bujar Nishani me kërkesën drejtuar Gjykatës Kushtetuese, është një veprim i cili as e shpëton atë nga shkelja e Kushtetutës dhe as i jep zgjidhje problemit, por thjesht kërkon ta fusë çështjen në një proces rutinë, dhe të prodhojë një krizë politike artificiale.
Së pari, Gjykata Kushtetuese ka një praktikë të konsoliduar, kur interpreton një nen të Kushtetutës. Nëse presidenti do të konsultonte sado pak fjalorin juridik, do të shikonte që Gjykata Kushtetuese shprehet për të interpretuar ndonjë nen të Kushtetutës, vetëm në kushtet “in abstacto”, që nënkupton se ajo shprehet në kushtet, kur interpretimi i saj nuk ka lidhje me një çështje konkrete. Pra, ajo nuk është udhëzuese e presidentit, kur ai është para detyrimit për të zbatuar Kushtetutën. Presidenti e ka detyrë për 7 ditë të zbatojë Kushtetutën dhe ai duhet ta zbatojë, ashtu siç ja thotë Berisha (meqë nuk ka mendim të vetin) mirë apo keq. Por, e ka detyrë të veprojë, të shprehet! Ai fjala vjen mund të mos i dekretojë ministrat, ose mund t’i dekretojë. Le ta bëjë si i thonë të tjerët. Kushtetua e urdhëron për këtë gjë. Ajo nuk i lë shteg të kërkojë ndihmë se si ta interpretojë. Detyrimin për kontroll të figurës së ministrave e ka Kuvendi, dhe ai nuk po e lë Kuvendin as ta bëjë këtë gjest.
Gjykata Kushtetuese nuk është telefoni i Sali Berishës, që duhet t’i biesh për çdo firmë që hedh në letër në Presidencë. Ajo është institucion, që bazohet mbi mbrojtjen e Kushtetutës kur shkelet dhe mbi interpretimin e saj, në kushtet kur kërkesa nuk ka interes konkret me ndonjë çështje në shqyrtim.
Bujar Nishani e di kaq gjë, se ka tre vjet që merr rrogën si president. Dhe nëse nuk e di, para se të pyesë Gjykatën, mund të pyesë Berishën, se ja tregon ai. Pra, jemi në kushtet kur Bujar Nishani po shkon me vetëdije drejt shkeljes së Kushtetutës. Ndaj dhe duhet hetuar për qëllimin që ekziston pas këtij akti.
Së dyti, kërkesa për të interpretuar Gjykata Kushtetuese një nen të Kushtetutës, edhe pse është i pavend siç e sqaruam më sipër, nuk mund të shërbejë si “masë pezullimi” për afatin kushtetues për dekretet e Nishanit. Detyrimi që për 7 ditë ai duhet të çojë dekretet në Kuvend, është i pandryshueshëm nga çdo akt tjetër i presidentit, nga çdo kërkesë e tij, biles dhe nga çdo hall fizik i tij.
Kështu që, ideja se ai mund të presë shprehjen e Gjykatës Kushtetuese, që të marrë një vendim, nuk e shpëton atë nga shkelja e Kushtetutës.
Këtë e thonë dhe ekspertët më të afërt të tij, por dhe sikur të mos e deklaronin, e ka qartazi Kushtetuta.
Në këto kushte jemi në një situatë kur presidenti po shkon me vetëdije dhe me qetësi drejt shkeljes së Kushtetutës. Nga profili presidencial që ai ka ndërtuar, është një president që e ka të ndaluar të ketë emocionet e veta, se ai vepron me emocionet e Berishës. Edhe nëse Nishani fjala vjen është i xhindosur me Ramën, ai e ka të ndaluar të xhindoset si president, për aq kohë sa Berisha nuk duket i xhindosur në këtë drejtim. Pra, përjashtohet pista personale, përse Nishani po shkon drejt shkeljes së Kushtetutës.
E vetmja gjë e besueshme, është një plan i përbashkët mes tij dhe Berishës, për të fituar kohë.
Përse i duhet kjo kohë Berishës?
Nuk jam i sigurtë nëse ai ka një ndonjë punë të pambaruar në zyrat e shtetit, që dikujt ja ka marrë përsipër t’ia mbarojë dhe i duhen dhe disa javë. Si kryeministri më i kapur nga mafia, bashkë me familjen, ai është ende në pushtet, jo vetëm me njerëzit e tij, por me bizneset e paligjshme të paprekura, me koncesionet e dhëna, që nga ngjyrosja e naftës e deri tek skanimi në dogana. Familja është e vetmja që nuk është prekur në bizneset e saj dhe ndoshta u duhet kohë dhe anarki për të qenë më të sigurtë. Më malinje do ishte të keqpërdorte presidentin për të sakatosur gjithë ngrehinën e shtetit shqiptar, për ta poshtëruar atë dhe për të thënë, unë mund t’i bëj çfarë të dua këtij vendi me këtë president që kam. Kjo duhet hetuar mirë dhe me qetësi.
Shkuarja me vetëdije të plotë drejt shkeljes së Kushtetutës, nuk ka lidhje fare me dokrrat që thotë Nishani dhe mënyrën si ja thotë Berisha. Duhet gjetur dhe goditur arsyeja përse Berishës, nuk i duhen në zyrë ministrat e rinj menjëherë. Dhe bëhet fjalë vetëm për një ministri, atë të Financave, pasi i Ekonomisë thjesht do ndërrojë zyrë.
/gazetatema.net/
