Nga Kreshnik Osmani
Po lexoj indinjatë në rrjetet sociale përse nuk dolën njerëzit në protestë për Shqipërinë (për shitjen e detit) dhe dalin për partinë.
Shqiptarët nuk dalin për Shqipërinë sepse në subkoshiencën e tyre me natyrë shkëmbore politika dhe historia kanë gdhendur idenë dhe bindjen se Shqipëria nuk jep dhe nuk shkakton asgjë tjetër veç dhimbjeve.
Shqipëria është e pafuqishme për të shkaktuar lumturi përveç tre rasteve.
Tek letërsia e Rilindasve.
Kur largohesh prej Shqipërisë dhe e sheh nga avioni dhe
kur të merr malli kur qëndron larg saj.
Pjesa tjetër është vetëm dhimbje, humbje, stres pa fund dhe varfëri.
Ndërsa partia rezulton tek subkoshienca e militantit si lopa e cila mund t’ua japë një llokëm të Shqipërisë. Partia është lopa që ha prej jonxhës së Shqipërisë dhe gjinjtë e saj e përkthejnë atë në qumësht për shqiptarin militant. Ndërsa Shqipëria është e pafuqishme për ta bërë këtë sepse është e kapur prej disa bandave që sipas ligjit quhen parti.
Kësisoj, të gjitha ato parti, grupe të shoqërisë civile, shoqata ose individë që nuk kanë fuqi apo nuk janë të liçensuar për ta grabitur Shqipërinë nuk kanë për të mundur të organizohen kurrë sepse shqiptarët janë shumë të varfër dhe pa e mbushur barkun nuk mendon askush për kulturën dhe qytetërimin.
Revolta është kulturë dhe qytetërim por uria i mposht sepse është më e fortë se ato. Oligarkia e mban popullin në varfëri ekstreme dhe ka si qëllim final vrasjen e çdo qelize të shoqërisë që kultivon revoltë, refuzim dhe protestë sepse vetëm kështu mund ta kontrollojë Shqipërinë. Të falësh 15 milje det është poshtërsi, por nuk ka tradhëti më të madhe se të vrasësh aftësinë e popullit për të mbrojtur interesat dhe vendin e vet. Ata ia kanë dalë. Ata janë tradhëtarët më të mëdhenj të Shqipërisë!
