Vizita në Tiranë e ministrit të Brendshëm të Italisë është organizuar gati në fshehtësi, ndërsa shtypit ju komunikua vetëm pak orë para se të ndodhte.
Bën përshtypje se në agjendën e planifikuar dhe bërë me dije nga Ministria e Brendshme e Shqipërisë, mysafiri Marco Minniti do të takohet me homologun e tij Fatmir Xhafa, kreun e shtetit Ilir Meta dhe do të marrë pjesë në një konferencë, ku do bëjë me dije që këtë vit sasia e mbjellë e kanabisit në Shqipëri është vetëm 1 për qind në krahasim me 2016. Ky përfundim ka dalë nga vëzhgimi ajror që kanë bërë forcat e specializuara italiane.
Në agjendë nuk ishte parashikuar një takim me kryeministrin e vendit. Kjo mbetet e pashpjegueshme, sepse një ministër i rëndësishëm i një qeverie mike si Italia e ka më të lehtë në protokoll të takojë kryeministrin se sa Presidentin. Kreu qeverisë gjithsesi e ka një justifikim për këtë mungesë në agjendën e njeriut të fortë të Italisë; një konferencë në Marok, ku është nisur me ngut duke dashur të evintojë rolin e tij në gjeopolitikën e rajonit.
Gjithashtu, ministri i Brendshëm i Italisë nuk pati kurrfarë takimi me drejtorin e përgjithshëm të policisë, Haki Çako, por zhvilloi një takim me kryetarin e Partisë Demokratike, Lulzim Basha, i cili ka kërcënuar që këto ditë do të dalin përgjime të reja.
Edi Rama i ka vlerësuar para pak ditësh gati si thashetheme të llojit “kazan” përgjimet italiane për grupin e Habilaj, të cilat përfshijnë eksponentë politikë të së majtës në pushtet.
Po kështu, opozita e akuzon kreun e qeverisë Edi Rama që është vetë i përfshirë me familjarët e tij në të tjera përgjime që do të bëhen publike së shpejti.
