Policia e Shtetit ka shpallur në kërkim 2 persona, për përplasjet që ndodhën gjatë ditës së djeshme pranë zyrave të partisë Fryma e Re Demokratike.
Burime bëjnë me dije se personat e shpallur në kërkim janë Agim Hoxhaj dhe Afrim Sufaj, ndërkohë që përplasjet në godinën e FRD-së kulmuan me mbërritjen e presidentit Meta, i cili kërkoi që Policia Bashkiake të largohet menjëherë nga zyrat e forcës politike që i është bashkuar koalicionit të opozitës.
“Më datë 13.03.2021, u referuan materialet në Prokurorinë pranë Gjykatës së Shkallës së Parë Tiranë, dhe punohet për kapjen e shtetasve A. H., 55 vjeç dhe A. S., 46 vjeç, sepse më datë 12.03.2021, në rrugën “Abdi Toptani”, kanë hyrë të paautorizuar në një godinë, duke kundërshtuar punonjësit që kryejnë një detyrë shtetërore ose një shërbim publik, të cilët kanë qenë në ruajtje të objektit. Punohet për kapjen e shoqërimin e tyre.
Materialet i kaluan Prokurorisë së Rrethit Gjyqësor Tiranë, për veprime të mëtejshme”, njofton Policia.
Vendi ku ndodhet objekti me adresë zyrat e Frymës së Re Demokratike, që për vite me radhë kanë shërbyer si selia e Partisë Demokratike të Shqipërisë, ka qenë në pronësi të Odeta Nishanit, bashkëshortes së ish-presidentit Bujar Nishani.
Në kohën kur qeveria drejtohej nga Sali Berisha dhe Bashkia e Tiranës nga Lulzim Basha, me anë të një Vendimi të Këshillit të Ministrave, objekti i kaloi Bashkisë së Tiranës. Pavarësisht se më vonë familja e Odeta Nishanit hapi një gjyq për marrjen e pronësisë, ajo e humbi me vendim gjykate këtë të drejtë ndërsa i mbeti në pronësi Bashkisë.
Sot, nga ana e Bashkisë pretendohet se FRD ka uzurpuar pronën e saj, ndërsa deklaron se ka pasur kontratë me afat që i ka përfunduar, por nga ana tjetër subjekti politik thotë se mbajtja e një selie nuk ka afate pasi ligji parashikon që një parti politike ka të drejtë institucionale për një ambient.
Një tjetër gjë që konstatohet është fakti se në njoftimin e parë për lirimin e ambienteve, letra nuk kishte numër protokolli dhe urshërohej me detyrim diçka e tillë, ndërsa në orët e pasdites, pas transmetimeve maratonë edhe në media, është bërë një korrigjim duke e theksuar se kërkohet lirimi vullnetar i ambienteve.
