Reshjet e një nate më parë kanë përmbytur toka bujqësore dhe shtëpi në zonën e Radostinës në Fier.
Raportohet se rreth 7 ha toka në anë të rrugës Fier-Seman janë përmbytur ndërsa banorët akuzojnë bashkinë si përgjegjëse të situatës.
“Vetëm gjysmën e kanalit kanë pastruar. Prandaj ndodh kjo. Janë mbytur të gjitha”, thonë banorët.
“Kërkojmë nga qeveria vetëm pastrimin e kanaleve. Të hiqen tubat e kanaleve. Kemi gati 30 vjet me këtë avaz”, thotë një tjetër banore banore.
Reshjet kanë shkaktuar përmbytje sipërfaqësore në qindra ha tokë në Fier por në zona të ulëta si ajo e Radostinës niveli i ujit ka shkuar në 30 cm.
Pastrimi i kanaleve kullues përgjatë dy viteve të fundit ka shmangur përmbytjet në zonat pranë lumit Vjosa si Levani dhe Frakulla të cilat përmbyteshin kur ujërat e lumit vërshonin në kolektorë. Por megjithë punën e bërë nga bashkia e Fierit ende ka zona problematike ku përmbytjet shkaktohen nga mosfunksionimi i kanaleve kullues.
