Salihi i jep 3-pikët korçarëve pas një penalltie të dyshimtë, por edhe ajo e akorduar për Partizanin që e zëvendësoi në Champions ia vlen të diskutohet
Në katër ndeshjet e luajtura sot, në kuadër të javës së parë të Kategorisë Superiore, kanë fituar vetëm kampionët e Skënderbeut dhe Partizani që gjatë periudhës së verës e zëvendësoi në Champions. Golat që përcaktuan fitoret erdhën në fund të takimeve dhe me 11-metërsha, si në stadiumin “Skënderbeu”, ashtu edhe në “Elbasan Arena”. Korçarët kanë dominuar, ndërsa Salihi është si gjithmonë protagonist, shënon dy herë, duke përfshirë edhe penalltinë e golit të avantazhit, megjithëse e dyshimtë, por humbi edhe një mundësi nga pika e bardhë.
Ndërsa Partizani padyshim që duhet të bënte shumë më tepër, pasi është e vetmja skuadër që ka qenë në aktivitet gjatë të gjithë verës duke marrë pjesë në kupat e Europës, ndërsa kundërshtari vinte nga një kategori inferiore dhe ende nuk është kalauduar plotësisht. Gjithsesi, goli i Bathës në të 90’ ishte më shumë se i rëndësishëm. Në “Niko Dovana” ka qenë një ndeshje shumë interesante midis vendasve të Teutës dhe Tiranës, me disa raste shënimi. Kjo ishte ndeshja e debutimit për trajnerin italian Bexhi të “djemve të detit”, ndërsa Tirana ka ende për t’u plotësuar, pasi trajneri Daja ka qenë i detyruar të mos kishte në dispozicion për arsye të ndryshme disa futbollistë të rëndësishëm.
