Kreu i Partisë Drejtësi Integrim dhe Unitet, Shpëtim Idrizi ka reaguar lidhur me mbledhjen e Këshillit të Sigurisë Kombëtare të zhvilluar mesditën e sotme nëpërmjet një video-konference.
Përmes një njoftimi, Idrizi shprehet se shpresojmë që thirrja që PDIU bëri një ditë më parë për TESTIMIN masiv të popullsisë, të jetë vlerësuar dhe të ketë marrë disi udhë.
Gjithashtu PDIU i bën thirrje qeverisë të blejë kitet e nevojshme për testimin e njerëzve, pasi kjo është rruga e sigurtë për sigurinë publike dhe rigjallërimin e jetës në vend.
Njoftimi i plotë
Presidenti, Kryeministri, Kryetari i Opozitës dhe anëtarët e tjerë të Këshillit të Sigurimit të Kombit bënë shumë mirë që u mblodhën.
Shpresojmë shumë të kenë marrë vendime të vlefshme e të qarta për sigurinë e Kombit.
Veçanërisht për ata qytetarë që kanë mbetur jashtë Shqipërie dhe që kanë nevojë urgjente për veprimin e shtetit.
Gjithashtu, shpresojmë që thirrja jonë për TESTIMIN masiv të popullsisë, të jetë vlerësuar dhe të ketë marrë disi udhë.
E theksojmë: TESTIMI masiv është ndriçimi i vetëm i rrugës ku po ecim.
Sot në treg ka metoda shumë të thjeshta testimi që zgjasin vetëm 15 minuta dhe që kushtojnë shumë pak euro.
Me këtë metodë testohet e gjithë forca aktive për punë, personeli i sistemit shëndetësor dhe gjurmimi dhe evidentimi sistematik i të prekurve.
Është ekstremisht e rëndësishme, jetike të mbahet gjallë EKONOMIA.
Vetëm 15 minuta dhe kuptohet je apo jo i infektuar.
I kërkojmë qeverisë ta adoptojë menjëherë këtë metodë dhe të blejë kitet e nevojshme për testimin e njerëzve.
Kjo është rruga e sigurtë për sigurinë publike dhe rigjallërimin e jetës në vend.
Sa më parë!
