Rudina Hajdari zyrtarizoi ditën e sotme vendimin për mosdjegien e mandatit të deputetit duke u shprehur se Parlamenti i jep oksigjen demokracisë.
Për këtë vendim të saj ka ardhur edhe reagimi i parë nga kampi demokrat. Gazment Bardhi, me anë të një postimi në Tëitter”, shkruan se vendimi i Rudina Hajdarit është personal, ndërsa mandati, sipas tij, është i demokratëve.
Më tej në postim, ai thotë se me këtë vendim, Hajdari nuk përfaqëson më Partinë Demokratike parlamentin e krimit, siç e quan ai, dhe nuk është më anëtare e Këshillit Kombëtar.
“Vendimi i Rudina Hajdarit është personal. Mandati është i demokratëve! Është e qartë se nga sot ajo nuk përfaqëson më Partinë Demokratike në Parlamentin e Krimit dhe për pasojë nuk është më as anëtare e Këshillit Kombëtar të PDSH. Kaq mjafton! Në rastin e Rudina Hajdarit, çdo vendim statutor është i panevojshëm, sepse formalisht ajo nuk rezulton e regjistruar si anëtare e Partisë Demokratike”, deklaron Bardhi.
Sa i përket përdorimit të figurës së Azem Hajdarit, Bardhi thotë se ai ka qenë dhe mbetet simbol i demokracisë dhe historisë së PD-së, ndërkohë që beteja dhe amaneti i tij për liri dhe demokraci janë sot më aktuale se kurrë.
“Azem Hajdari ka qenë, është dhe do të mbetet simbol i demokratëve dhe historisë së Partisë Demokratike. Beteja dhe amaneti i tij për liri dhe demokraci është sot më aktual se kurrë, kur Shqipëria rrezikohet nga një Qeveri ilegjitime, kriminale dhe e korruptuar. Për këtë amanet të Azem Hajdarit foli Kiri Hajdari në protestën e 5 Marsit, përkrah demokratëve që dorëzuan mandatet e deputetëve. Sakrifica sublime e Azem Hajdarit nuk do të shkojë dëm. Demokratët dhe qytetarët janë në këmbë për të mbrojtur Lirinë dhe Demokracinë, për të mos lejuar që shqiptarët të qeverisen nga krimi. Ata kanë folur qartë më 16 Shkurt dhe do të flasin edhe më qartë më 16 Mars: Shqipëria do të bëhet si gjithë Europa. Koha e Edi Ramës ka mbaruar”, shprehet Bardhi.
