Partia Demokratike ka kërkuar ndryshime rrënjësore në draftin e reformës në drejtësi, që nuk kanë asnjë lidhje me rekomandimet e ndërkombëtarëve.
Ndërkohë Ambasada Amerikane ka bërë një deklaratë ku shfaqet e zhgënjyer nga ndryshimi i mendjes së Lulzim Bashës dhe fajëson këtë të fundit, se po bën përpjekje të qëllimshme për ta bllokuar këtë reformë.
Ja deklarat e plotë e Ambasadës Amerikane:
Ambasada e SHBA është e zhgënjyer që vëren se pas deklarimit të një marrëveshjeje midis qeverisë dhe opozitës, kreu i opozitës, zoti Basha ka paraqitur një kërkesë të re të papranueshme.
Ky zhvillim i fundit na detyron të arrijmë në përfundimin se kjo është një përpjekje e qëllimshme nga kreu i opozitës për ta bllokuar këtë reformë. Paketa e reformës është gati dhe përmbush të gjitha standardet e Komisionit të Venecias, SHBA dhe BE.
Nëse zoti Basha nuk i përmbush dot premtimet e tij, Qeveria e Shteteve të Bashkuara iu bën thirrje anëtarëve të Parlamentit individualisht ta miratojnë këtë reformë më 21 korrik.
Nga ana tjeter ka reaguar dhe Eurodeputeti Knut Fleckenstein, ku tha se nuk i besohet që ka probleme të reja për reformën në drejtësi. Në një reagim në Twitter, ai shkruan se është i mërzitur me atë çka po ndodh në Shqipëri.
Fleckenstein: Probleme të reja? Nuk më besohet. Jam shumë i mërzitur. Tani duhet të presim për votat nesër? Atëherë do ta shohim. Më vjen keq!
