Albana Vokshi: Shëndetësia jo më humane, Rama e ktheu në armiqësi me qytetarët
“Korrupsioni skandaloz i koncesioneve dhe tenderave që i morën miqtë e Ramës, sollën krizën e madhe të mungesës së medikamenteve e pajisjeve bazë, me largimet masive, arbitrare dhe të paligjshme nga puna”, kjo është situate në shëndetësi sipas Partisë Demokratike.
Deputetja demokrate Albana Vokshi, tha sot se spastrimet me motiv politik në të gjitha spitalet rajonale dhe bashkiake të vendit koordinohen nga Ilir Beqaj, i mirënjohur si kampioni i korrupsionit në qeverinë Rama. “Vala e re e shkarkimeve në disa raste vjen për herë të dytë, siç po ndodh në spitalin e Fierit. Një jetë në shërbim, statusi social, eksperienca dhe performanca nuk kanë asnjë vlerë. Njerëzit hidhen në rrugë, hapen vende për militantët e partisë. Historia shokuese në spitalin rajonal të Gjirokastrës, ku infermierë dhe sanitarë pushoheshin me me letër me vrimë, po përsëritet në të gjithë vendin edhe pas denoncimeve në media”, tha Vokshi.
