Krerët e Partisë Demokratike kanë zhvilluar sot homazhe tek memoriali i Azem Hajdarit, liderit të Lëvizjes së Dhjetorit me rastin e Ditës së Dëshmorëve, 5 maj. Hajdari u vra pranë selisë së PD-së më 12 shtator 1998. Homazhet u bënë para memorialit të ri të tij që është ngritur pranë të vjetrit dhe i është bashkuar dhe emri i Besim Çerjas, që u vra bashkë me të.
Gjatë fjalës së tij, kreu i PDsë, Lulzim Basha deklaroi se në këtë ditë, nuk mund të mungonte dhe nderimi për heroin e demokracisë. Ai theksoi se opozita betohet që do ta mund krimin e veshur me uniformën e shtetit. “Nuk kishte si të mungonte urimi për figurën e demokracisë, Azem Hajdarin dhe mikun e tij Besnik Cerën. Ne vijmë sot këtu në këtë monument të ri, jo vetëm me nderimin për heroin tonë, por dhe me betimin se përsëri do ta mundim krimin e veshur me uniformën e shtetit, për ti dhënë shqiptarëve një Shqipëri demokratike, siç e dëshmuan studentët e Dhjetorit dhe Azem Hajdari. Lavdi përjetë Azem Hajdarit dhe dëshmorëve të demokracisë.”, tha Basha.
Ish-kryeministri Sali Berisha pas homazheve në memorialin e Azem Hajdarit, vlerësoi lart figurën e tij dhe akuzoi kryeministrin Rama se po flirton me vrasesit e Azemit. “Azemi dhe Besim Cerja ranë si dy vëllezër këtu para selisë së PD, të ekzekutuar nga pushteti që Azemi përmbysi me revolucionin e tij demokratik. Vepra e tij bëhet gjithnjë e më madhështore. Vepra e tij dhe e studentëve bëri të mundur të gjitha ngjarjet e tjera të mëdha që shqiptarët përjetuan 25 vitet e fundit. Ajo është dita ku e kanë origjinën arritjet e kombit shqiptar”, deklaroi Berisha.
Ai akuzoi kryeministrin Edi Rama se flirton me vrasësit e tij dhe se e ka frikë Azem Hajdarin edhe në ëndërr. “Edvin Kristaq Rama pikërisht në këtë moment historik, këtë 25vjetor ka filluar flirtin me vrasësit që dergjen në burgje apo që i nxori jashtë me dokumente false. Dua të them këtu, kjo tregon se ti edhe në gjumë edhe në ëndërr ke frikë nga Azem Hajdari. E vërteta është që ke 1000 arsye për të patur sepse Azemi është burim i pashtershëm frymëzimi për të rezervuar ty si neobllokmen, fatin që patën etërit tuaj”, tha Berisha.
