Marrjen e të dhënave tepër konfidenciale të mbi 910 mijë qytetarëve shqiptarë, patronazhistët e PS-së e paskan marrë duke punuar vite te vite të tëra në terren. Kështu na u shpjegua sot databazi i PS. Në terren mund të gjesh gjithçka, krim, drogë, korrupsion, abuzime, shantazhime, blerje vote, por deri më tani askush nuk ka gjetur 910 mijë karta identiteti apo numra telefoni. Siç duket Rilindja dhe Taulanti janë bërë “007”-a dhe gjejnë gjithçka nga vrima e çelësit. Po, po nga vrima e çelësit të bravës “e-albania”. Vetëm socialistët e shtetit nën hijen e pushtetit gjetën këtë çelës që hap çdo të dhënë të këtij portali, i cili shërben çdo të dhënë të qytetarëve shqiptarë. Se si një patronazhist i devotshëm i PS-së mund të gjejë numrin e kartës së identitetit apo numrin e telefonit të një qytetari shqiptar këtë askush nuk di ta shpjegojë. Se si mundet që të krijosh një databazë të këtillë e ta mbash në zyrat e partisë për të shënuar “PO” apo “JO” të votës, këtë vetëm Komisioneri për Mbrojtjen e të Dhënave mund ta shpjegojë. Sigurisht, nëse rastësisht Komisioneri nuk është votë e sigurtë për PS, sipas patronazhistëve.
Se si mund të keqpërdorësh e të sigurosh këto të dhëna, mund ta hetojë prokuroria e thjeshtë apo e përbërë e këtij shteti. Sigurisht, nëse rastësisht prokurorët e këtij shteti nuk janë votë e sigurtë për PS-në, sipas patronazhistëve.
Neni 122 i Kodit Penal qartëson saktë se ç’duhet të bëjë Prokuroria për patronazhistët e PS: “Përhapja e një sekreti që i përket jetës private të një personi nga ai që e siguron atë për shkak të detyrës ose të profesionit, kur detyrohet të mos e përhapë pa qenë i autorizuar, përbën kundërvajtje penale dhe dënohet me gjobë ose me burgim gjer në një vit.
Po kjo vepër, e kryer me qëllim fitimi ose për të dëmtuar një person tjetër, përbën kundërvajtje penale dhe dënohet me gjobë ose me burgim gjer në dy vjet”.
Hetimi sigurisht duhet të bëhet nga prokurorë që mos jenë ndër 910 mijë shqiptarët e patronazhuar nga PS-ja. Pra, duket paksa e vështirë.
Patronazhistët e kanë pyetur Taulantin se ç’duhet të bëjnë me gjithë këto sekrete të 910 mijë shqiptarëve.
A e dinë ata se numri personal që përmban karta e identitetit mund të përdoret lehtë tek e-albania për të krijuar llogari fallco duke abuzuar me pronën, certifikatën , të dhënat e shërbimet e tjera, por mund të abuzohet dhe me vaksinën “Rama vac”??
Taulanti, AKSHI apo Komisioneri për Mbrojtjen e të dhënave personale e dinë këtë gjë?
Nëse nuk e dinë atëherë le ta mësojnë prej Kodit Penal se së bashku me patronazhistët e tyre duhet të mbajnë përgjegjësi për nxjerrjen e këtyre të dhënave. Nëse nuk ju mjafton neni 122 le të lexojnë më tej nenin 294 të Kodit Penal: “Tregimi, përhapja dhe informimi i fakteve, shifrave, përmbajtjes së dokumenteve apo materialeve që, sipas ligjit të njohur publikisht, përbëjnë sekret shtetëror, nga personi që i është besuar ose që ka mundur të vijë në dijeni për to për shkak të detyrës, dënohen me gjobë ose me burgim gjer në pesë vjet.
Po kjo vepër, e bërë botërisht, dënohet me gjobë ose me burgim gjer në dhjetë vjet”.
Nëse përsëri nuk ju pëlqen as kjo, le të lexojnë nenin që e kanë për zemër të gjithë atë të “shpërdorimit të detyrës”, dhe përsëri po nuk u bindën ka më tej… neni 295: “Tregimi, përhapja dhe informimi i fakteve, shifrave, përmbajtjes së dokumenteve apo materialeve që, sipas ligjit të njohur publikisht, përbëjnë sekret shtetëror, nga cilido që ka mundur të vijë në dijeni për to, dënohen me gjobë ose me burgim gjer në tre vjet.
Po kjo vepër, e bërë botërisht, dënohet me gjobë ose me burgim gjer në pesë vjet”.
Meqë jemi në kohë zgjedhjesh hidhini një sy dhe neneve që flasin për zgjedhjet. Kështu do e kuptoni ju të PS-së që patronazhistëve duhet t’u kishit dhënë me vete, përveçse një kopje me të dhënat e 910 mijë shtetasve shqiptarë dhe një kopje të Kodit Penal, ta lexonin mirë e mirë se do ju hyjë në punë, nëse një ditë shteti do funksionojë dhe nuk do të jetë në duar të personave që janë shënuar me “PO” (e sigurtë), te databaza e Rilindjes.
