Xhevahir Sukaj transferohet për në Malajzi, pas 21 golave të shënuar për Partizanin, ndërkohë që maja e sulmit të të kuqëve zëvendësohet nga slloveni Dalibor Volos, mbërritur po nga deti i Kinës
Për të marrë dhe dhënë sulmues “race”, pikërisht ata që të garantojnë gola, Partizani ka zgjedhur një rrugë të gjatë, deri në detin e Kinës jugore. Xhevahir Sukaj shënoi 21 gola sezonin e kaluar për nënkampionët e vendit, por nuk mundi të arrijë një akord për të rinovuar dhe tashmë është transferuar në Malajzi, ku sezonin e ardhshëm do të luajë në kampionatin vendas për FC Perak. Flitet për një qytet me 2.477.700 banorë, pothuajse sa e gjithë Shqipëria dhe tashmë do të jetë protagonist në një stadium 42.000 vendësh, ndërkohë që për skuadrën e tij të re ka shënuar që në ndeshjen e parë miqësore si debutues. Xhevo, gjatë karierës së tij si profesionist, që nga sezoni 2004-05 dhe deri tani ka shënuar 108 gola me disa uniforma.
Ndërsa po nga Malajzia, për kampinatin e ardhshëm, prenotuar për majën e sulmit të Partizanit ka ardhur një tjetër bomber. Ky është slloveni Dalibor Volos, po 29 vjeç sa edhe Sukaj, vjen nga Pahang, fiks nga kampionati i asaj pjese të Azisë dhe në sezonin e fundit ka luajtur 12 ndeshje duke ka shënuar 6 gola. Por CV-ja e tij të bën disi optimist, pasi që nga sezoni 2005-06, në 254 ndeshje të luajtura ka shënuar 102 gola. Kështu duket, që për të bërë një lloj shkëmbimi të mirë, ndonjëherë ia vlen t’i biesh edhe nga “Kina”.
