Parma Calcio 193, skuadra dikur e famshme, e përbërë nga emra të mëdhenj, si Zola, Stoiçkov, Inzagi, Asprila e plot të tjerë, tashmë për shkak të falimentit vazhdon të jetë pjesë e Lega Pro. Por më në fund e ardhmja të bën të besosh. Skuadra e “kryqtarëve” ka gjetur një sponsor, madje nga ata të peshave të rënda. Flitet për AON, shoqëria e parë në botë për menaxhimin e riskut, për të qenë më të saktë, komisioner në sigurimin e shërbimeve këshilluese për burimet njerëzore. Aktiviteti është e vështirë të të thotë diçka në fushën sportive, por mjafton të sjellësh në vëmendje, që kompania multinacionale ka qenë sponsor zyrtar i Mançester Junaitid, që nga viti 2009-2014. Klubi dhe kompania kanë nënshkruar një kontratë 3-vjeçare, që në terma financiarë do të ndryshojë vit pas viti, në porporcion të drejtë me rezultatet sportive të Parmës. Nevio Skala, një nga personalitetet e futbollit Italian është së fundi edhe presidenti i klubit.
Por duhet sjellë në kujtesë, se që prej 21 dhjetorit 2014, klubi Italian u ble nga Rezart Taçi, pronar i ARMO, i cili më parë kishte eksperiencë futbollistike, si president i Gramozit të Ersekës, sponsor premium i Milanit, si dhe bashkëpronar i Leiton Orient në Angli, së bashku me Françesko Beketin.
Ndërsa as dy muaj më vonë nga prezantimi që i bëri superkrenarë të gjithë shqiptarët, shoqëria që ishte në dorë të një të riu që quhej Ermir Kodra, kaloi në pronësi të Xhampietro Manetit dhe më pas u shkatërrua si kurrë më parë…
