Papunësia ka rënë në tremujorin e dytë të vitit më 1.1 % sipas të dhënave të Anketës së Forace të Punës të Matur nga INSTAT.
Gjatë tremujorit të dytë 2016 në Shqipëri, shkalla e papunësisë në moshën 15-74 vjeç është 15,5 %. Krahasuar me tremujorin e pararendës, shkalla e papunësisë ka pësuar një rënie prej 1,1 pikë përqindje.
Krahasuar me tremujorin pararendës, punësimi gjithsej u rrit me 1,8 %. Ritmi i rritjes së punësimit sipas sektorëve kryesorë të ekonomisë nga tremujori i parë 2016 në tremujorin e dytë 2016 është: 2,9 % në sektorin e shërbimeve, 2 % në sektorin e industrisë dhe 0,9 % në sektorin e bujqësisë. Në terma vjetorë, punësimi për popullsinë 15 vjeç e lart u rrit me 6,8 %.
Punësimi në sektorët e industrisë (industri nxjerrëse, industri përpunuese, ndërtim dhe industri të tjera) u rrit me 9,9 % dhe në sektorët e shërbimeve u rrit me 9,6 %. Rritje të numrit të të punësuarve në terma vjetorë pati dhe sektori i bujqësisë me 3,4 %.
Ndërsa krahasuar me tremujorin e dytë të vitit 2015, shkalla e papunësisë në tremujorin e dytë 2016 u ul me 1,5 pikë përqindje. Për popullsinë e moshës 15-64 vjeç shkalla e papunësisë në tremujorin e dytë 2016 është 15,9 %. Për meshkujt e kësaj grup-moshë, shkalla e papunësisë është 17,0 % dhe për femrat 14,6 %. Krahasuar me tremujorin pararendës, në tremujorin e dytë 2016, shkalla e papunësisë për femrat e moshës 15-64 vjeç ka rënë me1,3 pikë përqindje. Ndërsa për meshkujt ka rënë me 0,8 pikë përqindje.
Gjatë tremujorit të dytë 2016, 38,9 % e të punësuarve të moshës 15-64 vjeç janë të angazhuar në sektorin e bujqësisë dhe 24,9 % e të punësuarve punojnë në sektorin e shërbimeve të tregut (tregtia me shumicë dhe pakicë; riparimi i automobilave; hotelet dhe restorantet; transportet, magazinimi dhe komunikacioni; ndërmjetësimi monetar dhe financiar; pasuritë e patundshme).
Punësimi në sektorin e shërbimeve jo të tregut (administrimi publik dhe i mbrojtjes; sigurimi shoqëror i detyruar; arsimi; shëndetësia dhe veprimtari të tjera sociale; aktivitete të tjera të shërbimit kolektiv; social dhe individual; shërbime në shtëpi; aktivitete të organizmave ndërkombëtare) përbën 16,5 % të punësimit total të grup-moshës 15-64 vjeç. Të punësuarit në industrinë përpunuese përbëjnë 9,9 % të të punësuarve 15-64 vjeç.
/monitor.al/
