Kreu i grupit parlamentar të PD, Edi Paloka, tha se Partia Demokratike nuk pret asnjë lëvizje të LSI dhe madje nuk e shpreson një gjë të tillë, por shkëputja e saj nga koalicioni është shpëtim për vetë partinë e Ilir Metës dhe jo për opozitën.
Në ditën e 33 të protestës, Paloka tha se opozita është e hapur për dialog por vetëm me një temë, atë të qeverisë teknike.
“Kryetari i PD e ka bërë të qartë qëndrimin edhe ndaj LSI, është një parti jo vetëm në koalicion me Edi Ramën por për fat të keq është partia që është kthyer në patericë e Edi Ramës, është ajo që po e mban në qeveri pavarësisht kundërshtimeve formale apo nuk e di si mund ti quaja ato që dalin herë pas herë në media gjoja kundërshtime. Fakti është që Edi Rama gjithë zollumet i ka bërë i mbështetur nga vota e LSI.
Sa i përket ndarjes apo jo të LSI unë e kam thënë dhe njëherë tjetër, nuk është PD që pret shpëtimin nga largimi i LSI nga koalicioni, shpëtimi nga largimi i LSI nga koalicioni do të jetë shpëtim për LSI jo PD. Dialogu mund të zhvillohet vetëm pasi Rama të japë dorëheqjen dhe të bjerë dakord për qeverinë teknike. Sigurisht që pasi të konkludohen për këtë pikë do të zhvillohen bisedime sepse qeveria teknike do të ketë disa detyra që duhet ti zbatojë dhe sigurisht kjo bëhet me mirëkuptimin dhe bashkëpunimin e të gjitha partive”, tha Paloka.
