Ministri i Jashtëm në detyrë në Kosovë, Behgjet Pacolli ka premtuar për banorët e prekur nga tërmeti se do të ndërtojë një pallat brenda 3 muajve për strehimin e tyre.
Gjatë një takimi të zhvilluar me kryeministrin Edi Rama në Krujë, Pacolli u shpreh se ky pallat do të ketë 45 apartamente.
“Nëse nuk ka pengesa në rastin më të mirë, një pallat, 45 banesa nga 80 metra katrorë, për 3 muaj duhet të kryhet. Aty ku ka pallate mirë është me zbrit poshtë, për të hapur hapësirë, se Kruja është qytet turistik. Vendosim dhe një fond ne dhe bëjmë një operacion që të dalë edhe qyteti i fituar. Rregullon kualitetin e jetës, më mirë në rrafsh ku krijohet një infrastrukturë tjetër, që ka afër shkollën e kopshtin”, tha Pacolli.
Kujtojmë që ministri kosovar dy ditë pas tërmetit dhuroi edhe 1 milion euro për banorët e pastrehë.
Ai u shpreh se kjo ishte më pakta që mund të bënte për shqiptarët.
