Në procesin gjyqësor ndaj grupit të Laert Haxhiut, i akuzuar si kreu i një organizate kriminale për 14 krime të rënda, mes të cilave vrasje, atentate, shpërthime me tritol dhe grabitje me armë, ka dëshmuar Bashkim Rajku, babai i këngëtarit Noizy (Rigels Rajku).
Ai u thirr si dëshmitar nga mbrojtja e Haxhiut, pasi prona e tij ishte shënjestër e një shpërthimi me tritol në Durrës, katër vite më parë.
Rajku tregoi se ngjarja ndodhi gjatë natës, ndërsa ai dhe familja ishin në gjumë.
Pas shpërthimit, lokali i vendosur në katin përdhes të objektit u shkatërrua, ndërsa banesa e tyre ndodhet në katin e pestë.
“Para 4 vjetësh ka ndodhur një shpërthim me tritol në biznesin tim. Kam qenë në gjumë, morëm vesh për ngjarjen, shkuam poshtë dhe gjetëm lokalin të shkatërruar. Banesa është në kat të pestë të të njëjtit objekt. E kemi dëgjuar zhurmën. Aty punonte stafi, shitëset, nuk kanë qenë punë, ka qenë i mbyllur lokali. Lokali ka qenë 3-4 vjet përpara ngjarjes i hapur si aktivitet.
Nuk kujtoj emra punonjësish, ka 4 vjet janë ndryshuar disa herë. Aktiviteti drejtohet nga goca ime, Anisa, sepse s’kemi vetëm këtë biznes, kemi 5-6 të tjerë që administron vajza. Anisa ndodhej jashtë vendit atë kohë. Djali (Rigersi) ka qenë në gjumë, se ka ndodhur orar i vonë, nuk e mbaj mend, mund të ketë qenë jashtë vendit.
Djali jeton shtëpi vetëm, në të njëjtin pallat. Kam qenë i stresuar se kam patur mendjen kush ka zbritur kush jo. O zotëri (prokurorit) jam 65 vjeç, nuk mbaj mend çfarë kam ngrënë dje, ju më pyesni erdhi djali apo jo, ku mbaj mend gjithë ajo kohë. Kur zbritëm ishin thyer xhamat, materialet brenda ishin dëmtuar. Është i vendosur lokali në katin zero.
Kamara ka patur, nuk di nëse kanë qenë në punë, roje nuk ka patur. Me djalin fola, as nuk njoh kush e ka bërë as pse. S’kam konflikte për çështje drejtësie. Djali artist është, ku di unë nëse ka patur konflikt a debat. Çështje xhelozie a rinie ku di unë, ça kam marrë vesh nëpër media. Kaq! Cleviol Ahmetin e kemi dëgjuar, edhe ai artist këngëtar ça është.
Di që merret me rrjete sociale, ka patur fërkime të vogla punë xhelozie me djalin tim, kaq di. Më duket se nga Lushnja është. Emrin e tij e besoj e kam dëgjuar edhe më përpara se të ndodhte ngjarja. Lulzim Spahija s’më kujton asgjë si emër. Kur flas për xhelozi e kam për punë muzike. Nuk mbaj mend të ketë patur ndonjë konflikt fizik mes tyre”, u shpreh ai.
Me kërkesë të SPAK, gjykata hoqi dorë nga pyetja e vajzës së Rajkut e cila u paraqit në gjykatë.
