Pas suksesit të çdo mashkulli fshihet një grua. Por, kur kemi një grua të suksesshme, çfarë fshihet pas saj?
Viola Kaloutsi është një emër “i vjetër” i diasporës në Kanada. Karriera e saj e shkëlqyer ka ditur të bëjë përpara falë përkushtimit, të kaluarës, rrënjëve…
Zonja Kaloutsi është e orientuar edhe nga çështje të shpirtit kur bëhet fjalë që dhimbjen e të parëve ta kthej në forcë. Me prindër çamë, e lindur në Shkodër, por prej 30 vitesh në Kanada, shqiptarja ka shumë të veçanta nga jeta e saj për të na rrëfyer. Viola është shqiptarja e parë grua, e cila shërbeu për shumë kohë në shoqatën shqiptare të vendosur në Toronto. Familja e tyre i ka gërshetuar mirë traditat shqiptare, çame dhe shkodrane, të cilat ende i zhvillojnë pranë komunitetit shqiptar.
“Ne jemi Çamëria”, “We are Chameria” është një fondacion i krijuar nga Viola e cila kërkon të përjetësojë masakrën që i është bërë popullsisë çame nga greket. Edhe për shkak të ndjeshmërisë, ajo u ka qëndruar gjithmonë afër kauzave të padrejta duke u ofruar sadopak nga zemërgjerësia e saj. Prej 3 vitesh, ky fondacion mbledh fonde për fëmijët në Kenia. Në bashkëpunim edhe me organizata të tjera, ato u vijnë në ndihmë fëmijëve të pastrehë, të uritur apo të sëmurë. Çdo vit, Viola rrugëton në Kenia si vullnetare për të qenë më afër realizimit të projektit të saj.
Për Albanian Montreal Press, Kaloutsi do të na shpjegojë më tepër mbi jetën e saj, punën vullnetare dhe moton e jetës.
1. Ju keni 30 vite që jetoni në Kanada, si i shihni ju emigrantët e sotëm?
Duke qenë se objektivi i qeverisë Kanadeze është të marrë njerëz të kualifikuar që me experiencat e tyre profesionale mund të kontribuojnë në mënyrë produktive në përpariminin ekonomik të këtij vendi, bën që dhe shqiptarët të jenë të sukseshëm në të gjitha fushat si shkencë, teknologji, business,drejtësi, arsim dhe degët e ndryshme të ekonomisë.
2. Cila është marrëdhënia me komunitetin shqiptar, a janë ata një kontigjent me prirje suksesi?
Emigracionin në Kanada e fillova me praninë time në komunitetin shqiptar dhe u bëra si degë e këtij trungu.
Roli i komunitetit ka qenë gjithmonë ndihmës në Diasporë. Në të kaluarën, kjo Diasporë shqipfolëse krijoi shqiptarët ndërsa sot shërben për të mbajtur frymën e shqiptarit, e cila përbën një element shumë të rëndësishëm, ku përfaqëson një patriotizëm për shqiptarët në mërgim. Veçanerisht komuniteti shqiptar në Toronto, vitet e fundit ka qenë mjaft i organizuar dhe i sukseshëm, dhe kjo është meritë e organizatorëve që e kanë drejtuar.
3. “We are Chameria” është fondacioni që këni krijuar ju. Si është historia e misionit të saj?
Fondacioni “Ne jemi Çamëria” në Kenia, u krijua nga dëshira për t’u dhënë ndihmë fëmijëve në nevojë, duke i konsideruar –të ngjashëm, të ndryshëm, të barabartë me gjithë fëmijët e tjerë në botë. Ndërsa emri i këtij fondacioni erdhi nga lidhja gjakore që kam une dhe vajza ime, nga kjo origjinë e cila u masakrua nga qeveria greke.
4. Si një grua në karriere, a mendoni se femra e ka vendin në shtëpi me fëmijët apo të dëshirojë suksesin në punë?
Emigracioni nuk të jep shumë mundësinë e të qënurit shtëpiake me përjashtim të një periudhe të shkurtër për lindjen apo rritjen e fëmijëve. Gjithmonë gruaja duhet të fokusohet në planet e saja, të jetë e organizuar dhe të gjëje balancën e drejtë mes profesionit dhe familjes.
