Po sulmohet mizorisht. Kush? Fan Noli! Në mënyrën më bizantine: duke e lavdëruar. Duke thënë sa i mençur ka qenë. Sa thellë e paskesh njohur popullin, psikikën e tij.
E bëjnë duke qarkulluar në internet një poezi. Të sajuar kthinave të errëta. Një strofë sot, një rresht nesër, shto ujë, shto miell. Dhe e ka shkruar Noli!
Njerëzit e do krahinave, në qiell. Të krahinave të tjera, blozë!
E përhapin ca të vetëshpallur intelektualë. Militantë të pavarur të pushtetit.
Paska edhe një strofë për “tropojanët”. Injoranca s’njeh kufi: në asnjë libër, shkrim, shkresë, faturë çfarëdolloj a vulë të kohës së Nolit nuk gjindet fjala “tropojan”, për mirë as për keq.
Sepse treva me emrin Tropojë, asokohe quhej Malësia e Gjakovës. Rrethi i Tropojës u sajua pas “çlirimit” për ta fshirë nga kujtesa Gjakovën.
Emri “tropojan” ca më vonë.
Është tepër i madh Noli, për t’i lënë në derë kopilin e përçarjes së shqiptarëve.
Përçarësit janë të tjerë.
U përshtatet një thënie e Konicës, por s’ma zë goja.
23 korrik 2018
https://www.syri.net/op-ed/181091/nje-kopil-ne-dere-te-nolit/
