Familjarët e Kleotos Çelikut kërkojnë drejtësi. 34 vjeçari që punonte në ndërmarrjen e Ujësjellës Kanalizime në qytetin e Shkodrës humbi jeton teksa po pastronte një pusetë të ujrave të zeza. Asfiksimi nga gazi i mori jetën Kleotosit. Daja i tij, Fadil Hasa kërkon që drejtësia të vihet në vend dhe kjo ngjarje të zbardhet deri në fund.
“Dua drejtësi dhe ngjarja të zbardhet. Do ta ndjek deri në fund”, thotë ai.
Daja i Kleotosit tregon se nipi i tij punonte pa asnjë lloj kushti thuajse ndërsa shpesh herë e ka këshilluar që të ndërronte punë për shkak të rrezikshmërisë.
“Nuk kanë patur asnjë kusht në punë. Disa herë i kam thënë që të ndërronte punë sepse kisha frikë se do infektohej por s’ma merrte mendja se do vdiste. Ky është shteti, këta janë institucionet tona që nuk të ofrojnë asnjë lloj kushti në punë dhe të detyrojnë të punosh në ato kushte”, shprehet ai.
Familja e Kleotos Çelikut e përbërë prej 5 anëtarësh tashmë pas humbjes së njeriut të tyre jetonte me vetëm dy lopë dhe pagën e 34 vjeçarit. Daja i Kleotosit kërkon që shteti të marrë përsipër dhe të sigurojë dy fëmijët e vegjël dhe bashkëshorten që nuk kanë asnjë të ardhur…
“Shteti duhet ta marrë përsipër familjen e Kleotosit. Janë të gjithë pa punë. Jetojnë me vetëm dy lopë. Dikush duhet të përgjigjet për fëmijët e Kleotosit dhe familjen e tij sepse jetojnë në kushte të vështira”, deklaron ai.
Disa persona u shoqëruan në policinë e Shkodrës pas ngjarjes së rëndë ku Kleotos Çeliku humbi jetën në pusetën e ujrave të zeza. Policia ndaloi vetëm Prekë Tomën me detyrë përgjegjës për ujërat e zeza në ndërmarrjen e ujësjellësit sepse 34 vjeçarit nuk i është dhënë as bombula e oksigjenit dhe as maska kundragaz. Mijëra qytetarë të Shkodrës kanë shorehur ngushëllimet familjes Çeliku pas ngjarjes së rëndë.
/Panorama.al/
