Për të përditshmen “New York Times” treni me mbishkrime nacionaliste serbe, “Ishte nisur drejt veriut të Kosovës, ku jetojnë shumica e serbëve atje, por u ndalua në kufi. Lëvizje kjo që i dha udhë një acarimi dramatik të situatës mes dy ish-armiqve të luftës”.
“New York Times” sqaron se zyrtarët kosovarë e kishin kundërshtuar rrugëtimin e planifikuar të trenit, si shkelje të sovranitetit të vendit, dhe ishin zotuar të mos e linin të kalonte.
“Kryeministri serb, Aleksandar Vuçiç menjëherë i dha ngjyrim situatës, duke thënë se: “Ne nisëm një tren, jo një tank”. Por treni i mbushur me flamuj të Serbisë, skena fetare ortodokse dhe me mbishkrimet “Kosova është Serbi” në 20 gjuhë të ndryshme, zor se mund të mos konsiderohej një provokim.
Presidenti Hashim Thaçi shkroi në faqen e tij në “Facebook” se Kosova e respekton lëvizjen e lirë të njerëzve dhe të mallrave, por një tren i mbuluar nga banera nacionaliste që shkelin Kushtetutën e Kosovës, është krejtësisht i papranueshëm.
Mediat e huaja si “Associated Press”, thekson se hekudhura është kontrolluar e gjitha nga Policia e Kosovës, por nuk u gjet asnjë eksploziv, si dhe “BBC”-ja e “Reuters”, i cili e pohon qartë që në titull qëndrimin e tij: “Kosova bllokon hyrjen e trenit ‘provokativ’ nga Serbia”, dhe thotë se incidenti shihet si test për vendin e vogël ballkanik.
