Vasili: Është një mundësi që distancat të minimizohen dhe të shkojmë drejt konsensusit
Mazhoranca dhe opozita do të ulen nesër në tryezën e Komisionit të Posaçëm për reformën në drejtësi për të nisur dialogun politik për të miratuar Reformën në Drejtësi.
Kryetari i grupit parlamentar, të LSI-së, Petrit Vasili, tha se tryeza e dialogut do të sheshojë mosmarrëveshjet që ekzistojnë mes palëve për reformën. Vasili tha se nuk paragjykohet asnjë prej kërkesave të opozitës dhe se mazhoranca është e prirur të bashkëpunojë në funsksion të miratimit të reformës në drejtësi. “Tavolina, dialogu politik është një mundësi që distancat të minimizohen, pra të ecet drejt konsensusit dhe them se një reformë kaq e madhe, kaq e komplikuar pa debat do të kishte qenë një proces fiktiv i pabesueshëm.
Debati dhe zbutja e distancave nëpërmjet debatit është llogjika që ecën politika. Politika është e thirrur që të marrë vendime. Është ajo që do ti marrë vendimet. Besoj se duhet të ulemi përderisa kemi edhe një sfond ekspertësh, do të thotë që kemi edhe mendje më të qeta dhe të marrim çdo pikë dhe të themi cilat janë pluset dhe minuset e altrenativës dhe të gjejmë zgjidhjen më të mirë, por nuk besoj se do ulemi me paragjykime. Po u ulëm me paragjykime debati do të jetë i vështirë dhe rezultatet nuk do të jenë ato që presim”, tha Vasili.
