Para disa javësh Gent Cakaj doli në një konferencë për shtyp dhe komunikoi shkarkime diplomatësh, sepse i akuzoi ata për nepotizëm. Madje, në këtë rast tha: “… Sfida evropiane e Shqipërisë dhe agjenda jonë reformiste e kapërcimit të pellgut të ndenjur të së shkuarës, nuk përkon kurrsesi me nepotizmin, klientelizmin dhe korrupsionin moral në asnjë sektor e lëre më pastaj në përfaqësitë e Shqipërisë nëpër botë”.
Prej ditësh në shtypin e Kosovës, ministri i Jashtëm në këmbë të Edi Ramës përflitet se bashkëjeton me vajzën e këtij të fundit, Rean.
Vetë Gent Cakaj është shprehur tejet i mërzitur në një tjetër komunikim me gazetarët se shtypi merret me jetën e tij personale, por nuk e ka mohuar këtë bashkëjetesë.
Në fakt, nëse ky lajm është i vërtetë kemi të bëjmë me nepotizëm në nivelin më të lartë të qeverisë.
Nëse ky lajm është kallp ministri duhet të dalë në konferencë shtypi ta përgënjeshtrojë, sepse jeta e tij private në këto nivele është jetë publike, ku dyshimet për nepotizëm kanë pasoja të rënda politike.
Por, halli më i madh është se mos ndonjë njeri zemërzi mendon që Gent Cakaj është ministër, për arsye nepotizmi dhe jo, pse është gjeni si e përshkruan i ashtëquajturi “vjehërr” sipas thashethemeve dashakeqe.
