Ndonëse zyrtarisht ministrat e Jashtëm thanë se nuk e kishin marrë dot një vendim për Shqipërinë dhe Maqedoninë e Veriut, mediat europiane e trajtojnë hapjen e negociatave si fat i vulosur tashmë.
“Euroacitve” shkruan se “Franca ka frenuar zgjerimin” ndërsa “Le Monde” thotë se “Parisi i mbylli dyert Tiranës dhe Shkupit”.
Nisur nga burime të presidencës franceze, “Euroactive” sqaron se qeveria e Emmanuel Macron nuk do të bjerë dakord për hapjen e negociatave në këtë moment.
“Këto vende do të jenë pjesë e Bashkimit Europian një ditë. Por është shumë herët për të folur mbi hapjen e procesit ligjor drejt zgjerimit”.
Ndërkohë nga Berlini, sipas një zyrtari të qeverisë, Kancelarja Merkel do të diskutonte me Presidentin francez para samitit të 17-18 tetorit.
Një burim i cituar nga “Euroactiv”, thotë se Franca mund të ndryshojë pozicion në samit, vetëm në rastin e një skenari hipotetik shkëmbimesh, të tillë si përqafimi i idesë për reformimin e Eurozonës nga Gjermania.
