Basha mbledh kryesinë e grupit parlamentar, unifikon qëndrimin me Berishën në mbrojtje të ish-ministrit
Kryetari i Partisë Demokratike Lulzim Basha, mblodhi kryesinë e grupit parlamentar për të ndryshuar qëndrimin rreth arrestimit të ish-ministrit të qeverisë Berisha, Spiro Ksera. Në kryesinë e grupit, Basha ka komunikuar vendimin se arrestimi i Kserës është politik dhe PD do ta mbrojë atë.
Një ditë më parë, sekretari i Përgjithshëm i PD-së, Arben Ristani, deklaroi se PD inkurajon hetimet ndaj ish-ministrit dhe se PD nuk do të bëhet asjëherë pengesë për hetimin e askujt. Ristani deklaroi se për PD është jetike lufta kundër korrupsionit. Por një ditë më pas, ish-kryeministri Berisha deklaroi tjetër qëndrim duke e cilësuar arrestimin e Kserës politik.
“Arrestimet jashtë flagrance, pa pyetur kurrë të arrestuarin, janë atavisëm i kohërave të shkuara, deshmi e dobësisë ekstreme të atij që lëshon urdhërarrestin!….
Duke shprehur vendosmërisht mbështetjen time të plotë për hetimin nga prokuroria të çdo dosjeje, të çdo personi mbi bazën e standarteve të një vendi të lirë, dënoj me ashpërsi arrestimin pa marrë në pyetje të ish ministrit Ksera, si një akt të porositur për qëllime të qarta politike”, shkruan Berisha në Facebook.
Pak orë më pas, Basha ka mbledhur kryesinë e grupit ku dhe ka deklaruar se PD ka qëndrim të unifikuar dhe ai do të jetë në mbrojtje të ish-ministrit të arrestuar.
