Edhe në ndeshjen midis përfaqësueseve Shpresa, të zhvilluar në Peristeri, futbollistët u përleshën me njëri-tjetrin, megjithëse më pas e cilësuan gjithçka si “nerva loje”
Nuk ka ndeshje që ndonjë përfaqësuese e jona të luajë në Greqi dhe të mos shoqërohet me incidente. Dhe këtu nuk bëjnë përjashtim as ato të moshave, siç ishte rasti i fundit me ekipet Shpresa, takim që u ndërpre më shumë se një herë, pasi futbollistët u kujdesën edhe të kacafyteshin me njëri-tjetrin. Tanët u mundën në minutën e fundit (ishin provizorisht në avantazh), pas një penalltie të kontestuar dhe kur i luajtën më shumë se 45 minuta me një futbollist më pak. Pra ishte një ndeshje shumë e rëndësishme për të dy skuadrat dhe incidentet mund të cilësohen thjeshtë nerva loje, po pse ndodhin vetëm atje! Edhe ndeshja e parë këtu dhe që përfundoi 0-0 ishte shumë e rëndësishme, por kishte vetëm ndonjë fjalë më shumë nga shkallët e stadiumit, ndërsa futbollistët u ndanë si miq. Më shumë se 10 vite më parë ishte shërish një ndeshje e nën 21 vjeçarëve, kur në Kretë thyen shtyllën ku ishte vendosur flamuri ynë, të cilin më pas e shqyen dhe ndeshja u ndërpre me insistimin e trajnerit tonë Hasan Lika, i cili nuk e nxirrte skuadrën në fushë, pa u zëvendësuar flamuri. Njëherë na u kërkua të shtyhej një ndeshje zyrtare, për shkak të një tërmeti që goditi Athinën dhe u shoqërua me viktima, por që UEFA e pranonte shtyrjen vetëm nëse tanët e miratonin kërkesën e palës greke. Dhe nuk kishte se si të ndodhte ndryshe, por u kthyem më pas për të zhvilluar ndeshjen e prapambetur, na pritën sikur të ishim ne shkaktarët e tërmetit. Dreqi e di pse ndodh gjithmonë kështu?!
