Procesi i zgjedhjeve në degën e Partisë Demokratike në Malësinë e Madhe është ndërprerë, pas një incidenti ku kutia e votimit është thyer. Me anë të një njoftimi për mediat, Komisioni i Rithemelimit ka dhënë versionin zyrtar ku thotë se kanë kërkuar anulimin e zgjedhjeve në Degën e Malësisë së Madhe, me arsyetimin se do të verifikohen të gjitha faktet që çuan në prishjen e procesit të votimit.
“Për situatën e krijuar në procesin zgjedhor të degës së Malësisë së Madhe. Komisioni i Organizimit dhe Monitorimit të Operacioneve Elektorale, është vënë në dijeni të ngjarjeve të rënda që kanë ndodhur sot, gjatë procesit të votimit për kryetar të degës, në degën Malësi e Madhe të Partisë Demokratike. Ndërkohë që Komisioni ka vendosur anulimin e zgjedhjeve në degën PD Malësinë e Madhe, ai është në procesin e mbledhjes dhe verifikimit të të gjitha fakteve dhe ndodhive që çuan në prishjen e procesit të votimit për të cilat do të shprehet me një vendim zyrtar. Komisioni vlerëson se integriteti, transparenca si dhe vota e lirë e anëtarëve është primare në këtë proces të rëndësishëm të rithemelimit të Partisë Demokratike” – thuhet në njoftimin e Komisionit të Rithemelimit.
Kujtojmë se procesi i zgjedhjeve në degën e Partisë Demokratike në Malësinë e Madhe është ndërprerë. Mësohet se shkak për ndërprerjen e procesit zgjedhor është bërë edhe një incident ku kutia e votimit është thyer. Kandidatët pretendojnë për fryrje të listave dhe votim masiv pa qenë anëtarë të Partisë Demokratike, duke ngritur akuza për votim edhe nga pjesëtarë të administratës së Bashkisë Malësi e Madhe.
