Mbrëmjen e djeshme në hyrje të pikës së kalimit kufitar të Kakavijës, duke ardhur nga Greqia është ndaluar nga shërbimet e doganës dhe policisë Panajot Barka, shef i departamentit të gjuhes greke në Universitetin e Gjirokastrës.
Ndalimi i tij është bërë pasi Barka mbante me vete rreth 100 libra, nga të cilët rreth 20 prej tyre ishin me përmbajtje historike për “Vorio Epirin”, ndërsa librat do të futeshin në Universitetin e Gjirokastrës.
Burimet bëjnë me dije që librat u sekuestruan dhe materialet në ngarkim të Barkës do i kalojnë prokurorisë.
Ndërkohë, policia e ka mbajtur të fshehtë këtë ngjarje, duke mos e raportuar as ndalimin e përkohshëm të Barkës dhe as sekuestrimin e librave.
Barka është përfaqësues i minoritetit grek në Shqipëri, dhe shpeshherë është akuzuar si antishqiptar.
Së fundi, ai ishte pjesë dhe e zhvillimeve në Bularat, ku u shpreh se koret e nacionalistëve grekë në funeralin e Katsifas nuk kishin asgjë antishqiptare, megjithëse aty u hodhën thirrje si: “Vritini qentë!”.
