Përgjigjia më e mirë mbi dilemën nëse janë apo jo cilësore prodhimet shqiptare vjen nga shifrat zyrtare mbi eksportin e prodhimeve “Made in Albania”.
Shembull i qartë në këtë drejtim është zgjerimi i eksportit të mollëve të famshme të Korçës, të cilat prej dy vitesh kanë pushtuar jo vetëm tregun e Europës por janë shndërruar në produktin e preferuar të konsumatorëve në tregjet aziatike dhe afrikane.
Por, para se këto produkte të kalojnë kufirin e vendeve ku do eksportohen, ato i nënshtrohen një kontrolli të lartë sigurie si nga pala shqiptare kur dalin, ashtu edhe ajo e vendit ku do të hyjnë në kohën kur mbërrijnë në destinacion.
Para futjes në tregjet e kërkuara, të gjitha prodhimet kalojnë përmes një “skaneri” i cili certifikon nëse prodhimet përmbushin apo jo standardet e kërkuara.
Të gjitha prodhimet i nënshtrohen kontrollit për përmbajtjen e kontaminuesve, kontrollit për mbetjet e pesticideve Po ashtu, kontrollit të shëndetit të prodhimit, në rastin konkret të frutave, gjurmueshmërisë. Kjo e fundit ka të bëjë me certifikatën e origjinës së kultivimit të prodhimit si dhe standardet e marketingut.
Vetëm kur analizat e dala nga kontrollet e lartpërmendura certifikojnë standardet e kërkuara, atëherë prodhimet nisin rrugën e tyre drejt tregjeve ndërkombëtare.
Të dhënat e fundit mbi eksportin e mollëve shqiptare drejt vendeve të BE si dhe futjes së tyre në tregjet e Afrikës dhe Azisë së Largët dëshmojnë vulën e cilësisë së lartë të këtij produkti të kultivuar masivisht ,sidomos në zonën juglindore të vendit.
Ky rast suksesi i eksportit të mollëve, nuk bën përjashtim për asnjë nga kulturat e tjera bujqësore shqiptare. Këto kultura eksportohen drejt tregjeve ndërkombëtare por shërben si shembull për të kuptuar mbi kujdesin dhe cilësinë e prodhimeve që fermerët kultivojnë në tokën shqiptare.
/AgroWeb/
