Gjatë prerjes së drunjve në veri të Mitrovicës janë dëmtuar një numër varrezash të qytetarëve të besimit islam, ka thënë për Radion Evropa e Lirë, Nexhat Uglani, këshilltar boshnjak në Kuvendin Komunal të Mitrovicës së Veriut.
Ky lajm është konfirmuar edhe nga policia e Kosovës.
Për Uglanin kjo që ka ndodhur është një vandalizëm institucional. “Të gjithë kanë qenë të habitur. Por më së shumti kemi qenë ne të habitur me këtë pamje të pahijshme. Ata i kanë prerë drunjtë, por duke i prerë drunjtë i kanë dëmtuar edhe gurët e varrezave”.
Për dëmtimet në varreza janë njoftuar edhe Bashkësia Islame në Mitrovicën e jugut Kuvendi Komunal dhe policia. Referuar ngjarjes, Besim Hoti, zëvendës drejtori i Policisë në veri të Kosovës tha se rasti është i hapur si “dëmtim i pasurisë” dhe i është paraqitur prokurorit.
