Me 63 vota pro dhe 27 kundër, ligji për mbetjet kaloi në Parlament pas një seance afërsisht 12-orëshe. Kuvendi ka miratuar edhe amendamentin e deputetit të LSI-së, Petrit Vasili, për monitorim të këtyre mbetjeve në pikat doganore nga shoqëria civile.
Nga mazhoranca kanë votuar kundër 3 deputetë.
Kryeministri Edi Rama, duke folur në Parlament u ka kërkuar deputetëve të kalojnë këtë ligj, duke siguruar se ligji nuk ka hapësira për djegie apo varrosje të mbetjeve brenda territorit shqiptar, siç ishte më parë.
Ndërsa opozita e konsideroi si një ligj të mafias.
Shoqëria civile ka protestuar përballë godinës së Parlamentit gjatë zhvillimit të kësaj seance, por edhe pas miratimit të ligjit për mbetjet.
