Në muajin korrik Ilir Metës i përfundon mandati si president dhe do duhet të zgjidhet një i ri. Kujtojmë se mazhoranca ka deklaruar që, me apo pa bashkëpunimin e opozitës, do të zgjidhet një emër i ri. Lidhur me këtë çështje ka folur sot Prof. Dr. Artan Fuga, i cili ka theksuar se më i rëndësishëm se emri që do të marr këtë rol, është nevoja urgjente për të rishikuar kompetencat e institucionit. “Gjëja e parë që duhet të rregullohet është rregullimi i institucionit të Presidentit. Ilir Meta ka kthyer shumë ligje, por rezultati është zero, se s’ka pasur kompetenca”, thotë akademiku në një intervistë televizive.
Sipas tij, politika e ka rifilluar diskutimin mbrapsht dhe në vend që të përqendrohet se si të vërë në funksion rolin e presidenti, lufton për një emër që i intereson palëve. Fuga shpjegon se Presidenti duhet të ketë më shumë pushtet, në të kundërt cenohet balanca e pushteteve. “Një Presidenti të ardhshëm, ose i duhet dhënë pak më shumë pushtet që të ketë një rol në ndërtimin e ligjeve dhe në nxjerrjen e ligjeve, ose të ketë një fuqi të caktuar ndaj disa vendimeve të qeverisë, disa kufizimeve që i duhen vendosur. Ose ai ka nevojë që të ketë fuqi pak më të madhe në raport me parlamentin.
Nuk po them që të ketë fuqi që në kushte të caktuara të shpërndajë parlamentin, por një President që nuk ka këto fuqi, na sjell një kryeministër, cilido qoftë ai, që zotëron qeverinë, Presidentin e izolon, ka shumicën në parlament dhe kështu zotëron pushtetin legjislativ, zotëron dhe të gjitha fuqitë kushtetuese të vendit. Ka dhe partinë dhe tërë sistemin politik dhe tërë administratën në dorë”, shprehet ai.
Në këtë mënyrë, shton Fuga, “po shkojmë te një pushtet i personalizuar dhe ky është problemi, do të jemi me një President, që nuk do të ketë asnjë lloj roli dhe ky është defekt i jashtëzakonshëm dhe do të vazhdojë të jetë për qytetarët”. Sipas Artan Fugës emri duhet të zgjidhet sipas rregullave dhe pa ndërhyrje. Ndërsa shtoi se në këtë situatë të keqe, Edi Rama do të dilte ballëhapur, nëse do t’i thoshte opozitës më thoni ju një propozim, cilido qoftë dhe unë të pranoj. Ose më dërgoni katër emra dhe kush të marrë më shumë vota, të caktohet.
