Presidenti Ilir Meta ishte sot në kazermën e FSK-së “Adem Jashari” në Prishtinë, ku i pranishëm ishte dhe Kryeministri në largim i Kosovës, Ramush Haradinaj.
Meta falenderoi ushtrinë e Kosovës për ndihmën që dhanë në operacionin e kërkimit-shpëtimit, si dhe nuk mungoi as dekorata për qenin që ishte pjesë e ekipit të kërkim shpëtimit, të cilin Presidenti e puthi.
Qeni me emrin “Satak” i njësisë speciale të Kosovës, arriti të lokalizojë një person që u nxor i gjallë nga rrënojat në Thumane, ndërsa arriti të lokalizonte edhe 2 trupat e pajetë të çiftit Greku dhe një pjesëtar të pajetë të familjes Cara.
“Kosova duhet të jetë krenare për FSK-në dhe Policinë e saj. Çdokush do të ishte krenar për atë që keni bërë te ne. Me qëllimin e vetëm për të shpëtuar jetë njerëzish. Ju shpëtuar shumë jetë, ndihmuat shumë banorë. Na u gjetët pranë në kohërat më të vështira. Iu shprehim mirënjohjen më të thellë për këtë solidaritet shembullor. Me këtë ndihmë ju na dhatë forcë edhe ne të gjithëve. Unë shpreh mirënjohje për gjithë popullin e Kosovës”, ka thënë presidenti i Shqipërisë, Ilir Meta.
