Deputetja Mesila Doda ka reaguar mjaft ashpër për rritjen deri në 70 për qind të linjave të avionëve. Ky shtrenjtim galopant bëhet në vigjilje të sezonit turistik, kur si përherë ka një shtim të vajtje-ardhjeve në Shqipëri dhe mbi të gjitha janë emigrantët që frekuentojnë më së shumti Rinasin.
Rritja kaq e madhe e çmimeve ka indinjuar ligjvënësen, e cila kërkon reagimin e menjëhershëm të qeverisë. Ja çfarë shkruan ajo në faqen e saj:
Situatë e PADURUESHME!
Është kriminale ajo që po ndodh me çmimet e biletave të avionëve në Shqipëri. Nga një kërkim i shpejtë, po vërej se të gjitha, absolutisht të gjitha çmimet e biletave janë rritur thuajse dyfish dhe as që bëhet fjalë per linja low cost, që deri para pak kohësh funksiononin me gjithë problemet që kishin. Nuk di çfarë masash ka menduar ministria e linjës po deri tani puna dhe rezultatet janë për të vënë kujën. Duhet të jetë një nga fushat e ardhshme të vëmendjes dhe llogaridhënies në Parlament, dhe jo vetëm. Qytetarët shqiptarë nuk mund të vazhdojnë të abuzohen dhe të trajtohen si qytetarë të dorës së dytë. Kjo historia e monopolit te aeroportit, më duket argument krejt jobindës. Dhe tek e fundit nëse monopoli është dhënë gabim dhe në kundërshtim me interesat e qytetarëve, dikush duhet të mbajë përgjegjësi dhe dikush tjetër duhet të ndërhyjë me forcën dhe autoritetin e ligjit antimonopol. Gjithsesi, situata është e PADURUESHME!
