Sopoti ndalohet nga njerëz të maskuar përpara ndeshjes me Pogradecin dhe i kanë kërkuar t’i lënë ndeshjen liqenorëve, duke ia arritur qëllimit. Takimi i luajtur në Krujë përfundoi 0-2
Kthehen maskat në rrugë, madje në mes të ditës dhe meqenëse jemi në Shqipëri, arsyeja e këtij “show” kërcënues nuk ishte grabitja. Eshtë ndaluar autobuzi i ekipit të futbollit Sopoti, pa mbërritur në stadiumin e Krujës dhe njerëzit e maskuar, të cilët dolën nga një fuoristradë, i kanë kërkuar futbollistëve dhe stafit t’i lërë ndeshjen Pogradecit. Kërkësa “zyrtare” e drejtuar librazhdasve duket si fjalëkryq, qoftë edhe për arsyen se pse ka ndodhur pikërisht në atë aks rrugor. Për t’u sqaruar, ndeshja Sopoti – Pogradeci, e vlefshme për javën e 22-të të Kategorisë së parë, Grupi i Jugut, meqenëse Sopoti nuk ka ende një impiant të vetin ishte caktuar të luhej në stadiumin “Kastrioti”. Sipas njoftimit standart, mjeti i kërcënuesve nuk është identifikuar dhe kështu që nuk ka se si të pretendosh të ndalohet, ndërsa futbollistët e Librazhdit dhe stafi që e shoqëronte kanë bërë denoncim në policinë e Krujës përpara fillimit të takimit. Dhe sa për satistikë, maskat në rrugë e bën efektin, pasi ndeshja që u zhvillua pas ngjarjes përfundoi 0-2 për pogradecarët.
