Komisioni Qendror i Zgjedhjeve ka vendosur të hapë kutitë në disa Qendra Votimi të Tiranës ku PDIU dhe PS kanë ankesa për rezultatin.
Me 7 vota pro KQZ vendosi të hapë kutitë të cilat pas rinumërimit mund t’i japin PDIU mandatin e Tiranës ose ai do t’i mebtet PS.
Hapja e kutive dhe rinumërimi i votave të 72 kutive, do të zhvillohet nesër në orën 10:00 në ambientet e KQZ-së.
PDIU kërkoi sot në KQZ saktësimin e numrit të votave të vlefshme që duhet t’i shtohen kësaj force duke u bazuar te materialet filmike.
“Në vijim të shqyrtimit tonë ka 66 vota që edhe pse janë të vlefshme nuk janë cilësuar si të tilla ndaj kërkojmë të verifikohen”, tha përfaqësuesi i PDIU në KQZ.
Në mbledhje ishin të pranishëm përfaqësues nga të dyja forcat ankimuese ku theksuan se janë dakort për një proces sa më transparent.
Avokati i PS tha se më shumë se fituesi ka rëndësi procesi duke rënë dakord me kërkesën e PDIU.
Përfaqësuesi i kësaj të fundit deklaroi: “Mendojmë se PS në mënyrën si e ka shprehur ankimin i mungon legjitimiteti pasi nuk ka asnjë pretendim që ndonjë nga votat e këtij subjekti të jetë tjetërsuar”.
I pranishëm në mbledhje ishte edhe kreu i PDIU, Shpëtim Idrizi i cilitha se në të gjitha kutitë e Tiranës nuk ka përputhje të votave me procesverbalet.
Shpëtim Idrizi ka ankimuar rezultatin e Tiranës duke faktuar me pamje filmike tjetërsimin e votave të PDIU, ndërsa është 37 vota larg të qenit deputet i Tiranës.
