Nga Elvis Hoxha
Malit të Zi i dhuruam tokë që të anëtarësohet në NATO, Serbisë i dhurojmë Mitrovicën për një copë të Preshevës që ajo të anëtarësohet në BE, i dhurojmë një emër me referendum shtetit antishqiptar të Maqedonisë që t’i lehtësojmë NATO-n dhe BE-në. Shqiptarët nuk duhet të pranojnë më të luajnë lojën e të tjerëve.
Gjithnjë rezultat është spastrimi i shqiptarëve dhe rrudhja e trojeve të tyre.
Për shqiptarët flasin ende më të korruptuarit e tyre. Ndaj shqiptarët nuk besojnë më as te politika e as te shtetimi. Është urgjente të nis rithemelimi i politikës në protestë e në shesh. Është urgjente të mos dërgohen më në negociata njerëz të kërcënuar prej gjykatave speciale e normale si Thaçi e Limaj. Ata do t’ua japin Kosovën e copa lindore të saj ish-funksionarëve të Milosheviçit veç për t’i shpëtuar drejtësisë speciale.
Evropianët janë të aftë të shpikin gjykata speciale sa herë që u intereson të tërheqin prej hunde përfaqësuesit tanë të inkriminuar. Ndërsa ne me protesta duhet t’i detyrojmë ndërkombëtarët të ftojnë përfaqësuesit tanë më të ndershëm e më të ditur në negociatat ku luhen interesat tanë.
