Duket se me ndërrimin e trajnerit te PAOK-ut ka përfunduar edhe ankthi i Ergys Kaçes. Mesfushori ynë nuk ka qenë shumë i preferuar nga trajneri Igor Tudor, gjë që e ka shqetësuar futbollistin, aq më shumë në prag të finaleve të Euro 2016. Por së fundi, klubi grek e ka shkarkuar për rezultate të dobëta ish-futbollistin e përfaqësueses së Kroacisë dhe në vendin e tij në pankinë është ulur Vladimir Iviç, ish-trajneri i të rinjve të Paok-ut, i cili i ka garantuar menjëherë një uniformë titullari futbollistit tonë. Problemet e Kaçes janë të hershme tek skuadra greke, kur sezonin e kaluar u pezullua pas një foto të postuar në “facebook”, ku pozonte me një bluze ku ishte stampuar stema e UÇK-së. Ndërsa trajneri De Biazi e ka nxitur të transferohet në Serinë A, ku nuk kanë munguar ofertat nga Lacio, ndërsa tani edhe nga Fiorentina. “Kaçe është vërtetë shtatshurtër, por është interesante ta shohësh në fushë, pasi është i gatshëm t’i fitojë pothuajse të gjitha dyluftimet. Nga statistikat e kampionatit grek ka qenë më i spikaturi në pasimet pas shpine”, ka përfunduar trajneri i Kombëtares tonë, i cili shprehet I bindur që me përfundimin e kampionatit Ergys Kaçe do të largohet nga Selaniku.
