Ditën e sotme SPAK i dërgoi kërkesë Kuvendit që t’i hiqet mandati dhe imuniteti deputetit Alqi Bllako, pasi është vërtetuar akuza se është i përfshirë në aferën e inceneratorëve, konkretisht në inceneratorin e Fierit.
Ndërkohë nuk ka munguar edhe përgjigja e Kuvendit, i cili para pak minutash ka njoftuar se ditën e nesërme në orën 18:00 do të zhvillohet mbledhja e Këshillit për Rregulloren, Mandatet dhe Imunitetin të Kuvendit, për shqyrtimin e kërkesës së ardhur nga SPAK për dhënien e autorizimit për arrestimin e deputetit Alqi Bllako.
“Ju njoftoj se nesër, më datë 30.03.2022, ora 18:00, në Kryesinë e Kuvendit, nën drejtimin e Kryetares së Kuvendit, znj. Lindita Nikolla, do të zhvillohet mbledhja e Këshillit për Rregulloren, Mandatet dhe Imunitetin të Kuvendit, për shqyrtimin e kërkesës së ardhur nga SPAK për dhënien e autorizimit për arrestimin e deputetit Alqi Bllako. (Urdhër nr. 22, datë 29.03.2022, i Kryetares së Kuvendit, znj. Lindita Nikolla” – thuhet në njoftimin e Kuvendit.
Kujtojmë se Bllako akuzohet nga SPAK për shpronësim toke në mënyrë të kundraligjshme për inceneratorin e Fierit, si dhe ka favorizuar kompaninë koncensionare.
