Gjykata Kushtetuese pranon kërkesën e PD-së për antikushtetueshmëri të vendimit të Kuvendit për të mos çuar në Kushtetuese çështjen e mandatit të deputetit Kokëdhima
Gjykata Kushtetuese ka pranuar kërkesën e Partisë Demokratike për antikushtetueshmëri të vendimit të Kuvendit për të çuar pranë kësaj gjykatë çështjen e imunitetit të Kokëdhimës.
Ky vendim i Gjykatës Kushtetuese i hap rrugë një tjetër kërkesë që mund të vijë nga PD apo tjetër parti parlamentare, për heqjen e imunitetit të deputetit Koço Kokëdhima. Gjykata Kushtetuese vendosi që të pranojë pjesërisht kërkesën e PD-së.
“ Interpretimin e nenit 70/4 të Kushtetutës si vijon: Në rast se Kuvendi i Shqipërisë vihet në lëvizje me mocion të kryetarit të Kuvendit ose një të dhjetës së anëtarëve të tij, në kuptim të pikës 3 të nenit 70 të Kushtetutës, ai duhet të vendosë dërgimin e çështjes në Gjykatën Kushtetuese, e cila është organi i vetëm që ka kompetencën të shqyrtojë në themel çështjen dhe të vendosë mbi papajtueshmërinë e mandatit të deputetit.
Konstatimin si të papajtueshëm me Kushtetutën e Republikës së Shqipërisë të vendimit nr.48/2015 të Kuvendit të Shqipërisë “Për mosdërgimin në Gjykatën Kushtetuese të çështjes për konstatimin e papajtueshmërisë me detyrën e deputetit të zotit Koço Kokëdhima.”
“Ky vendim është përfundimtar, i formës së prerë”, thuhet në vendimin e Gjykatës Kushtetuese.
Mazhoranca rrëzoi pak javë më parë kërkesën e opozitës për të çuar në Gjykatën Kushtetuese heqjen e mandatit të deputetit Koço Kokëdhima. Opozita pretendon se Kokëdhima ka fituar qindra tendera publikë këto dy vite të qeverisë Rama.
