Zbardhen detaje të reja nga atentati që tronditi kryeqytetin, mbrëmjen e kaluar, ku u ekzekutua me plumb në kokë biznesmeni Memli Begalla, 64 vjeç, nga Progonati i Tepelenës. 64-vjeçari ka zbritur nga kati i pestë i pallatit, ku poshtë ishte një shesh.
Biznesmeni i është drejtuar makinës së tij, pikërisht aty ku e prisnin dhe atentatorët. Këta të fundit i janë afruar viktimës, teksa kanë qenë duke marrë makinën, dhe e kanë qëlluar me një plumb në kokë, me silenciator, duke larguar me shpejtësi nga vendngjarja.
Burime të Report Tv bënë me dije se autorët kanë ikur në drejtim të sheshit ‘Wilson’, me një makinë të zezë tip ‘BMW’.
Ndërkohë, Report Tv ka zbuluar dhe një vendim të Gjykatës së Apelit Tiranë, ku biznesmeni Begalla ishte paditur për borxhe. Pikërisht kjo është dhe njëra pistë ku po hetojnë policia dhe prokuroria. Gjithashtu, një tjetër pistë hetimi është ajo e trafikut të drogës.
